Un curso para formarse en atención á infancia, o último do programa ILES
Por Redacción
O ILES chega á súa fin. O programa de formación e inserción laboral, impulsado polo Concello de Pontevedra durante este mandato, conclúe cun último curso. A Xunta de Goberno aprobou este luns as bases reguladoras da convocatoria final dunha iniciativa pola que pasaron 330 persoas ao longo de case catro anos, das cales preto dun 50% lograron un contrato de traballo.
Segundo a concelleira de Promoción Económica, Carlota Román, o ILES é un "exemplo" do traballo que pode realizar un concello "para luchar contra la lacra del desempleo". Explicou que o obxectivo era "coger gente sin trabajo y que necesitaba actualizar su formación, darle un curso de capacitación y después gestionamos las prácticas en empresas", tras o cal se lles facía un acompañamento, "lo que se llama un itinerario de inserción laboral".
O boletín de información laboral PonteEmprego publicará este mércores o anuncio deste novo curso. Esta convocatoria ofrecerá formación na especialidade de atención á infancia. Haberá un total de quince prazas. A formación total abranguerá 365 horas. A parte teórica de desenvolverá en horario de mañá e as prácticas en horario de mañá ou tarde en función das necesidades das empresas colaboradoras.
Durante o proceso de selección, os candidatos serán puntuados conforme ao baremo incluído nas bases. Os criterios de puntuación son estar empadroado en Pontevedra, non ter participado en edicións anteriores, ser muller, ter menos de 30 anos ou máis de 45, pertencer a un colectivo especial ou levar máis de cinco anos no paro. As persoas seleccionadas deberán pasar ademais unha entrevista persoal.
Para poder acceder a este curso, a "porta de entrada" é a oficina do Servizo Galego de Colocación, recordou a concelleira socialista. Os aspirantes deben expresar alí a súa vontade de participar neste programa municipal.
O programa, que conta coa subvención do Fondo Social Europeo, inclúe o pagamento dunha bolsa de 15 euros por cada día lectivo, polo que, ademais de formarse e inserirse no mercado laboral, os participantes perciben tamén uns emolumentos.
Relacionadas:
-
Catorce mulleres e un home fórmanse en atención á infancia no último itinerario do ILES
Por Redacción |
-
Abre o prazo de inscrición do terceiro Plan de Emprego municipal con 170 novas prazas
Por Redacción |
-
Máis de 400 persoas atoparon traballo tras participar nas iniciativas municipais de emprego
Por Alejandro Espiño |