A Deputación e a Xunta coordínanse para aproveitar mellor os recursos destinados a educación
Por Redacción
A Deputación de Pontevedra e a Consellería de Cultura, Educación e Ordenación Universitaria veñen de fixar un marco de colaboración no que tamén se coordinarán cos concellos para unha maior eficacia dos recursos destinados á educación. Executarán de xeito coordinado as obras de reforma, ampliación e mellora que son competencia da Xunta de Galicia en centros de educación infantil, primaria e educación especial na provincia de Pontevedra e aquelas de reparación, conservación e mantemento que son competencia municipal.
En función do convenio asinado entre o presidente da Deputación, Rafael Louzán, e o conselleiro de Educación, Román Rodríguez, ambas as dúas administracións investirán 2,7 millones de euros en obras en 84 centros educativos da provincia. Todas as actuacións deberán estar rematadas o 31 de decembro de 2015, se ben poderá haber aprazamentos excepcionais.
A Deputación destinará este ano 1,4 millóns de euros para traballos de reparación, conservación e mantemento nas instalacións de 39 centros educativos da provincia. Trátase de traballos tales como pintura, reparación de elementos de carpintería, limpeza de canalóns, arranxos de tellados ou reposición de cristais, e de zonas de xogo, entre outras.
A Consellería financiará as obras de reforma, ampliación e mellora en outros 33 centros educativos de 25 concellos. Cun investimento de 992,000 euros, as actuacións previstas atenden á reparación de cubertas, reforma de fachadas, mellora de instalacións eléctricas, pavimento de pistas, eliminación de barreiras arquitectónicas, illamentos, ou caldeiras, entre outras.
Na reunión estiveron presentes alcaldes de varias decenas de concellos da provincia e deuse a coñecer que no protocolo se recollen outras 23 actuacións en centros de titularidade municipal e que os concellos sufragarán con fondos propios. Trátase de traballos de acondicionamento que suman preto de 280.000 euros destinados a ó correcto mantemento das instalacións educativas.
Este protocolo tamén responderá á necesaria mellora nas instalacións deportivas dos centros educativos para satisfacer as necesidades do alumnado. O obxectivo é poder abrir estas dependencias ó seu uso por parte do resto da poboación fóra do horario lectivo para fins educativos, deportivos e culturais.