O bo tempo chegará ás Rías Baixas a partir do próximo sábado
Por Redacción
Creada e actualizada
Creada e actualizada
Ao longo deste luns 23 irán incrementándose as nubes con motivo da inestabilidade derivada das baixas presións. Os ventos continuarán soprando do nordés e irán aumentando de intensidade ao longo da xornada.
O martes 24 iranse achegando ás Rías Baixas ventos do norte con aire frío pero abriranse grandes claros en Pontevedra. As temperaturas mínimas situaranse arredor dos 7 graos e as máis elevadas chegarán aos 15 graos.
As baixas presións que se desprazan polo Atlántico e o anticiclón dos Azores permitirán a entrada de aire frío e húmido procedente do norte durante o mércores. Desta forma, os ceos permanecerán parcialmente anubrados. As temperaturas mínimas descenderán e as máximas non experimentarán cambios significativos. Os ventos soprarán de compoñente norte, moderados na zona litoral, variando cara ao oeste a medida que avance a tarde.
O xoves 26 chegarán as chuvias que serán xeneralizadas e persistentes sendo máis intensas na metade oeste, segundo a información que facilita MeteoGalicia. Durante a tarde, as chuvias diminuirán a súa intensidade e non serán tan xeneralizadas. Os ventos soprarán frouxos de compoñente oeste e as temperaturas iniciarán un ascenso durante esta xornada situándose entre os 8 e os 14 graos.
O venres tamén haberá unha alta probabilidade de precipitacións e será o sábado cando o anticiclón comece a entrar en Galicia con ventos do nordés de cara á Semana Santa. Iso si, as temperaturas seguirán sendo frescas.