Retiran oito metros dunha cornisa metálica que ameazaba con caer en Caldas polo forte vento
Por Redacción
A eclipse solar non foi o único fenómeno meteorolóxico que atraeu a atención da xente este venres. O forte vento que se está a rexistrar nas últimas horas provocou que se descolgasen unhas chapas metálicas dun edificio en Caldas de Reis, obrigando os servizos de emerxencia a retiralas ante o risco de que caesen sobre a rúa.
Segundo informou Protección Civil de Caldas de Reis, o aviso produciuse ás 12.54 horas cando as devanditas chapas se descolgaron da fachada do edifico número 59 da rúa Juan Fuentes. As testemuñas alertaban de que ameazaba con caerse e causar danos.
Efectivos do Bombeiros do Salnés, auxiliados polos GES de Valga e efectivos de Protección Civil de Caldas, traballaron ata as dúas da tarde para retirar oito metros de cornixa metálica, que tivo que cortarse á metade para poder retirala con seguridade.
Ao mesmo tempo, axentes da Policía Local encargáronse de regular o tráfico na zona, xa que se limitou parcialmente a circulación ata que se completaron estes traballos.
Finalmente, non houbo que lamentar danos persoais nin materiais máis alá das chapas metálicas que houbo que retirar.