As obras de humanización da rúa Jaime Janer entran na súa recta final
Por Redacción
O Concello de Marín segue executando a bo ritmo as obras de humanización da rúa Jaime Janer. Segundo informa o goberno municipal, o estado actual destes traballos permite comprobar que as conducións dos servizos de auga e abastecemento están xa finalizados, así como as distintas acometidas das edificacións existentes.
Quedaría para a próxima semana habilitar unha das conducións de auga e finalizar a colocación da pedra nas beirarrúas.
Este plan de traballo "estase a realizar con moito persoal, de xeito intenso, profesional e rápido e cumprindo os prazos que inicialmente se estableceron", sinalan dende a casa do concello marinense.
Unha vez finalizadas as beirarrúas, levarase a cabo o formigonado do carril de circulación, que irá ao mesmo nivel e serán de formigón pulido. Esta tarefa obrigará a pechar a rúa ao tráfico por completo, actuación que será previamente avisada pola empresa antes da súa execución.
Posteriormente colocaranse as xardineiras que separarán a beirarrúa da calzada, así como tamén nas interseccións coa rúa Concepción Areal.
"Os prazos vanse cumprindo e en consecuencia será a próxima semana cando xa se poida ir vendo unha maior proporción de beirarrúa rematada e todas as melloras previstas", destacan no goberno municipal.