A nova senda peonil entre Souto e Moraña estará rematada en abril
Por Redacción
As obras para habilitar sendas peonís na estrada entre os lugares de Souto e Moraña estarán rematadas no vindeiro mes de abril. Os traballos están ao 50% de execucion e este mércores recibiron a visita do director da Axencia Galega de Infraestruturas, Francisco Menéndez.
As obras están a acometerse na estrada Cuntis-Porráns (PO-226) e consisten en crear unha senda 475 metros de lonxitude entre a saída do núcleo de Souto e o polígono da Frieira, xusto antes da entrada da travesía de Moraña. O investimento para a execución das mesmas elévase a 45.159 euros.
A senda peonil discorre pola marxe dereita da estrada e xa conta con beirarrúas nas dúas marxes da estrada. A actuación permitirá que os veciños destes núcleos conten cun itinerario diferenciado para o uso en exclusiva dos peóns.
As obras consisten na execución dunha senda formigón de color ocre de entre 1,5 e 1,8 metros de ancho. Nos últimos 60 metros, treito no que a estrada discorre polo polígono industrial, habilitarase ademais unha banda de aparcadoiro. A actuación complementarase coa canalización das augas pluviais entre a calzada e a senda peonil.
Na visita, Menéndez estivo acompañado polo delegado territorial da Xunta en Pontevedra, José Manuel Cores Tourís, e a alcaldesa de Moraña, María Luísa Piñeiro.