Urbanismo ultima a modificación do PXOM para cualificar como privado o chan de La Cultural de Sanxenxo
Por Redacción
Técnicos do Concello de Sanxenxo e do Servizo de Montes da Consellería do Medio Rural e do Mar desprazáronse este mércores á parroquia de Nantes para proceder ao levantamento do monte comunal Pedrouzos-Contumil co obxectivo de clarificar que o Círculo Cultural e Deportivo de Sanxenxo non invade o devandito espazo. E é que o departamento de Urbanismo remitiu recentemente un informe de contestación ao escrito da Xunta de Galicia que indicaba que unha fracción dos terreos onde se emprazan as instalacións pertence á Comunidade de Montes.
Dende o Concello de Sanxenxo acreditaron, pois, que se trata dunha franxa de titularidade privada e, polo tanto, non incluída na área mancomunada onde está situado o colexio, a casa de cultura, o local de regantes e a área recreativa. Tras comprobar in situ a veracidade do apuntado pola Administración local, a Consellería do Medio Rural e do Mar ratificou que non hai tal invasión e si un erro no esbozo que figura na ficha do monte veciñal como estudo previo, que non foi incluído na resolución do Xurado Provincial de Montes Veciñais Mancomunados.
Urbanismo pode, pois, continuar coa tramitación da modificación puntal número 4 do Plan Xeral de Ordenación Municipal promovida polo Goberno local coa finalidade de eliminar a cualificación como equipamento público do chan do Círculo Cultural e Deportivo de Sanxenxo. Así, o Executivo municipal pretende que a tipificación recollida no documento sexa acorde á natureza das instalacións existentes, de maneira que seguirá considerándose chan rústico de protección ordinaria, pero pasará a ser dotacional privado.
Con iso, Urbanismo solucionará a incorrección detectada no plan aprobado no ano 2003, no que se delimitaba como equipamento público un terreo que pertencía a particulares, sen que se considerasen nin os mecanismos de obtención da súa propiedade por parte da Administración local nin as previsións económicas para facerlle fronte.
Salvado o escollo que atrasou a culminación do expediente, o departamento local terá todo listo nos próximos días para propoñer ao Pleno da Corporación a aprobación provisional desta modificación que, posteriormente, deberá obter o visto e prace definitivo da Xunta de Galicia.