Ábrese o prazo para solicitar praza nas escolas infantís da Galiña Azul
Por Redacción
Os pais que o desexen poderán solicitar dende este martes unha praza nalgunha das 157 escolas infantís públicas da rede A Galiña Azul para as que a Consellería de Traballo abriu o prazo de inscrición, que se prolongará ata o 23 de marzo.
Segundo informou este luns a directora xeral de Familia e Inclusión, Amparo González, a relación provisional de admitidos e en espera publicarase o 5 de maio e o listado definitivo estará dispoñible o 29 do mesmo mes. Os admitidos terán de prazo entre o 1 e o 10 de xuño para matricularse nas case 9.300 prazas públicas dispoñibles para nenos de entre 3 meses e 3 anos.
Esta cifra supón 523 prazas dependentes da Xunta máis que as ofertadas no anterior curso, tras a incorporación á rede A Galiña Azul de oito novas escolas públicas e a cesión de dous centros ata agora municipais.
Entre as novidades, Amparo González destacou que se equiparará a situación laboral das familias monoparentais coa das familias nas que o neno conviva cun só proxenitor.
O pasado curso foron 2.820 os nenos que quedaron en lista de espera, sen unha praza nunha escola infantil.