O Concello de Poio prevé un derrubamento "pacífico" no Vao tras solucionar o realoxo das familias afectadas
Por Oskar Viéitez
O alcalde de Poio, Luciano Sobral, prevé que os derrubamentos de tres choupanas no asentamento marxinal do Vao, se produzan este martes 3 de febreiro de xeito "tranquilo e pacífico" tras solucionar transitoriamente o Concello o realoxo das familias afectadas pola sentenza do Tribunal Superior de Xustiza de Galicia.
Segundo informou o rexedor os servizos sociais do concello, con cargo ao programa de Emerxencia Social, asumirá durante dous meses o aluguer de tres vivendas na localidade, unha para cada familia. Foron os propios afectados os que lograron dar cos pisos de propiedade particular. Ademais, solicitouse a bolsa de aluguer e vivenda protexida da Xunta.
"Nos tiñamos dúas opcións, ou buscar una fórmula máis tranquila para dar cumprimento á sentencia ou ir a demolición sen máis, pero parecíanos que dende o punto de vista social as familias non podían quedar desamparadas e intentamos chegar a un acordo", dixo o alcalde.
Este luns o alcalde indicou que a terceira familia, unha parella maior que non ten fillos ao seu cargo, tamén optou por unha vivenda en aluguer despois de rexeitar a posibilidade de instalarse con familiares.
Luciano Sobral explicou que a empresa necesitará dúas semanas para completar os derrubamentos xa que unha das vivendas esta unida estruturalmente a outra sobre a que non pesa a orde de derrubamento, polo que será necesario levantar un muro para soster unha das choupanas e garantir a súa seguridade.
Os traballos iniciaranse este martes ás nove da mañá.
Relacionadas:
-
Executan de forma discreta o derrubamento das tres choupanas do poboado do Vao
Por Redacción |
-
A falta de efectivos policiais obriga a aprazar o derrubamento de tres chabolas do Vao
Por Anxo Lourido |
-
Poio fixa para o 3 de febreiro o derrubamento de tres chabolas no Vao 'supervivintes' de 2007
Por Oskar Viéitez |
-
Poio adxudica o derrubamento de tres chabolas do Vao
Por Oskar Viéitez |
-
O Tribunal Superior ordena o derrubamento de tres chabolas do poboado do Vao
Por Oskar Viéitez |