Turismo Rías Baixas negociará en Fitur co Imserso para captar máis visitantes en tempada baixa
Por Oskar Viéitez
Na "ampla axenda" programada en Madrid polo presidente da Deputación de Pontevedra, Rafael Louzán, figura un encontro cos responsables do Instituto de Maiores e Servizos Sociais, Imserso, para captar máis visitantes para as Rías Baixas en tempada baixa.
Segundo o informou o presidente da administración provincial, esta negociación farase durante a Feira Internacional do Turismo de Madrid, Fitur. Un evento que arranca este mércores e ao que Turismo Rías Baixas acode con grandes expectativas de negocio porque "ir para nada, mellor non imos", dixo Louzán.
O mandatario provincial explicou que se concertaron numerosas entrevistas con touroperadores, profesionais e institucións das que dependen este tipo de viaxes para concretar paquetes de turismo.
Os técnicos da Deputación centraranse en difundir dúas publicacións sobre os espazos naturais e a oferta gastronómica de Pontevedra, "dentro do paraugas de Turgalicia".