Os traballadores de Diario de Arousa van á folga e piden apoio social nunha concentración na rúa
Por Redacción
Os traballadores de Diario de Arousa farán folga a partir das 8.00 horas deste venres en esixencia do pagamento das cantidades debidas pola empresa e a presentación dun plan de viabilidade que garanta a continuidade dos postos de traballo. A protesta pode supor que este sábado o xornal non chegue aos quioscos.
A medida de protesta, que se repite en todas as cabeceiras do grupo Editorial La Capital (El Ideal Galego, Diario de Ferrol, Diario de Bergantiños e Deporte Campeón), durará ata as 8.00 horas deste sábado día 24 de xaneiro e estará acompañada dunha mobilización na rúa. Farán unha concentración ás 20.00 horas na Praza de Galicia e pide á sociedade arousana que lles dea o seu apoio coa súa asistencia.
Nos útlimos días, distintos colectivos deron o seu apoio aos traballadores nas súas reivindacións, entre eles o Colexio Profesional de Xornalistas de Galicia (CPXG), que se solidariza cos traballadores. A Xunta de Goberno lembra que "a precariedade no exercicio profesional do xornalismo só pode redundar nunha redución da calidade e a pluralidade da información que recibe a sociedade".
Dende o CPXG insisten en que a información "non é algo que se poda producir mediante procesos industriais nos que se poden aforrar custes de man de obra, senón que precisa bos profesionais que traballen en situacións dignas".
"A precariedade no exercicio profesional do xornalismo só pode redundar nunha redución da calidade e a pluralidade da información que recibe a sociedade"
A Asociación da Prensa da coruña (APC) tamén lamenta a "delicada situación" da empresa editora e sinala que "espera e desexa" que se xeren as condicións necesarias para garantir a continuidade dos diarios e preservar os dereitos adquiridos polo equipo de traballadores.
E desde o sindicato CIG explica que a folga convócase en defensa dos seus empregos, dunhas condicións laborais dignas e en demanda do cobro dos seus salarios. Alertan da "inseguridade laboral", á que hai que sumar que dende hai máis de un ano o persoal padece constantes atrasos no pago dos seus salarios, recortes dos dereitos laborais
Segundo fontes dos traballadores usadas polo sindicato, "soportamos débedas derivadas do impago das nosas nóminas e das pagas extraordinarias". De feito, aínda acaban de cobrar a parte que tiñan pendente do salario de novembro, pero descoñecen cando percibirán a nómina de decembro ou as cantidades das extras que lles adebeda a empresa.
Relacionadas:
-
Traballadores do Diario de Arousa convocan unha folga indefinida dende o xoves
Por Redacción |
-
Os traballadores de Diario de Arousa afrontan dous días de folga contra despedimentos e impagos
Por Redacción |
-
Os traballadores de Diario de Arousa irán á folga o 23 de xaneiro
Por Redacción |
-
Traballadores de Diario de Arousa concéntranse para denunciar "reiterados atrasos" nos salarios
Por Redacción |