Asfaltan as rúas Tiro Naval e Concepción Areal
Por Oskar Viéitez
A empresa COVSA está a acometer o asfaltado dalgúns tramos da zona urbana de Marín que teñen que repoñer as zonas que resultaron danadas por obras de servizos.
Durante este martes abordáronse a rúa Tiro Naval Janer e Concepción Areal.
A Policía Local coordina a actuación para evitar as incomodidades que se poidan derivar para o tráfico. Neste sentido, dende o goberno local, pediron desculpas á cidadanía polos transtornos xerados.
LABORES DE LIMPEZA E ROZA
Por outra parte, dende o goberno local informaron que este mércores comezarán os traballos de limpeza de camiños e viais municipais nos barrios de Pedreiras, Pedreiras de Abaixo, A Estivada, Arealonga, A Cañota, Pitanxo, A Laxe, Souto do Carregal, O Carregal, Casal, Bravos, Viñas Blancas, Coirados, A Raña, Outeiro, Carballal, A Pena, Bouza, San Xulián, A Grela, Iglesario, Coirados, Rosa Branca, Roza, Macenlle e Vista Alegre.
Os traballos consistirán na roza en marxes de camiños e viais de competencia municipal, o soprado, recollida e traslado de restos e a limpeza de cunetas nos puntos de necesidade.
Estes traballos de limpezas serán realizados pola Fundación Juan XXIII, que xa os vén realizando nalgunhas zonas cun grao de eficacia e efectividade moi importantes. Os labores que realizan no concello de Marín dende hai anos son moi apreciados e valorados polos veciños. Ademais destas zonas manteñen os seus traballos en zonas xa que as veñen desbrozando e limpando dende hai tempo.