O PP reclama a creación de carrís-bici para reducir o uso do coche en Poio
Por Redacción
Ángel Moldes, o voceiro do grupo municipal do Partido Popular en Poio, presentou unha proposta sobre a mobilidade alternativa para que se debata no próximo pleno da corporación municipal.
Na proposta reclama ás distintas administracións, Concello, Deputación, Xunta e Goberno central, que impulsen un modelo de mobilidade sostible no Concello con especial atención ao uso da bicicleta e para iso pide a implantación de ciclovías ou "carrís-bici" nas distintas vías.
Dende o PP ínstase a adaptar os viais ao tránsito peonil, ciclístico e compartido. Neste caso fai especial fincapé na administración local por ser o titular das estradas máis susceptibles desta adaptación.
Por último, na proposta plenaria reclama poñer en marcha estacionamentos disuasorios e buscar fórmulas para a utilización compartida de vehículos e outras iniciativas para mellorar a sostibilidade, seguridade e humanización dos desprazamentos.
Moldes indica que a rede viaria de Poio é utilizada diariamente por 25.000 vehículos de motor e por iso encontra insuficiente o actual modelo de mobilidade.