Meli Fandiño xubila o micrófono
Por Oskar Viéitez
A xornalista Meli Fandiño cumpre 65 anos este 16 de xaneiro. Este aniversario ten un especial significado porque supón a súa xubilación como traballadora de Radio Pontevedra.
Meli Fandiño Barbosa empezou a traballar aos 16 anos como locutora. Foi o seu "padrino de bautismo", José Hermida Vidal, quen lle abriu as portas da emisora local EAJ40, onde se integrou nun equipo conformado por Fuentes Mora, José Luis Adrio, Ricardo Barajas e María Elena Alonso "Lelé".
O seu gran salto profesional produciuse cando aceptou o reto de "sacar el micrófono a la calle para hacer radio". Así, coincidindo coa chegada da democracia, Meli deu voz aos pontevedreses, coñecendo as súas inquedanzas e preocupacións. Deste modo formou tándem fronte ao micrófono con Hipólito Fraguas no programa La Opinión, do que máis tarde tomaría as rendas en solitario.
"La Opinión no opina, Meli opina en La Opinión", bromeaba o xefe de redacción, Eugenio Giráldez sobre a implicación da xornalista nalgúns temas, especialmente o seu barrio: Mollabao.
Porque, aínda que naceu en Praceres, Meli vive en Mollabao e o reivindica con orgullo.
Pontevedra non se entende sen Meli Fandiño e viceversa. Sirvan de mostra estes exemplos: o seu pai, Andrés Fandiño, foi condutor do trolebús de Pontevedra a Marín e alí coñeceu a súa muller, Dolores Barbosa.
Meli é incondicional do Entroido pontevedrés, daqueles cines "de pantalla grande", da Feira Franca, mesmo a convenceron no ano 2011 para ser pregoeira das festas da Peregrina. "En ningún otro sitio habría querido nacer y en ningún otro, vivir", proclamou entón dende o balcón do Pazo de Mugartegui.
Este venres ela foi a protagonista no Magacine, e entre bágoas, agradeceu a todos esta vida chea de radio. Grazas a ti, Meli.