Pontevedra acollerá o XXI Encontro Luso-Galego de Química e o III Simposio de Enoloxía
Por Oskar Viéitez
Pontevedra acollerá o XXI Encontro Luso-Galego de Química que ten por obxectivo fomentar o intercambio científico e tecnolóxico entre Portugal e Galicia. Paralelamente a esta cita desenvolverase o terceiro simposio de Enoloxía.
O decano do Colexio Oficial de Químicos de Galicia, Antonio Macho Senra, acudiu este xoves ao Concello de Pontevedra, para presentar ao alcalde, Miguel Anxo Fernández Lores, estes congresos internacionais que reunirán unhas 250 persoas, os días 18, 19 e 20 de novembro, no Pazo da Cultura.
A xénese dos Encontros Luso-Galegos de Química tivo lugar a principios de 1984, celebrándose o primeiro deles en novembro de 1985, en Santiago de Compostela. Pasados 30 anos do nacemento desta idea Pontevedra acollerá esta cita na que os químicos galegos tratan de "relacionar as universidades coas industrias e que teña unha aplicabilidade esa investigación, para transferir ese traballo e que sexa apreciado", explicou Macho Senra.
Neste encontro colaboran as tres universidades galegas xunto ás industrias biotecnolóxicas, pequenas empresas que traballan en síntese de produtos, na investigación en tratamento de residuos, depuradoras ou conserveiras, entre outras.
Segundo explicou Antonio Macho estes encontros pretenden constituír un foro de discusión e intercambio de ideas orixinais e innovadoras entre científicos e investigadores procedentes da universidade e da industria, que traballan no amplo campo da química e da enxeñaría química en todas as súas vertentes e disciplinas.
"Trátase de dar voz a todos os egresados universitarios e ás industrias", xa que este tipo de encontros "facilita a publicación e a comunicación dos traballos", afirmou o decano.
Antonio Macho recordou a importancia de apostar pola investigación, pero asegurou que "ten que existir unha transferencia de coñecemento" xa que ao seu xuízo "a investigación pola investigación tampouco ten sentido".
Todos os investigadores, especialmente os novos estudantes de doutorado e os bolseiros de investigación, están invitados a presentar os seus traballos, preferiblemente como comunicación oral, de maneira que poidan discutir intensamente os seus traballos cos científicos máis activos e os representantes da industria presentes.
Ademais haberá cinco relatorios plenarios, unha delas correrá a cargo dun científico de gran proxección internacional.
En canto ao Simposio de Enoloxía, o decano aludiu á importancia da química na elaboración do viño, malia que non está ben considerada popularmente esta intervención aínda que "se o viño non ten química, mal asunto, hai que poñerse a tremer", dixo Antonio Macho.
O simposio contará coa intervención da prestixiosa química e enóloga, Isabel Mijares, académica de número da Real Academia de Gastronomía.