Ingreso psiquiátrico para o acusado de queimar colectores de papel por toda a cidade
Por Redacción
O Xulgado de Garda determinou o ingreso nun centro psiquiátrico de Vigo do veciño de Pontevedra detido dúas veces en dez días tras ser 'pillado' in fraganti prendendo lume a colectores da cidade.
O home, de 57 anos, foi sometido a un exame psiquiátrico no Hospital Provincial de Pontevedra para determinar se presentaba algunha patoloxía e, posteriormente, foi derivado ao Xulgado de Garda. Alí decidiuse que necesita tratamento.
A súa detención en ambas as dúas ocasións foi froito de intervencións conxuntas das policías Local e Nacional de Pontevedra e atribuíronlle, ata o momento, unha decena de incendios noutros tantos colectores.
A súa última actuación rexistrouse na madrugada deste domingo 4 de xaneiro. Varias persoas avisaron a Policía da queima de varios colectores de papel e a Policía Local logrou detectalo coas cámaras de tráfico das que dispón a Xefatura da Policía Local. Atribúenlle ese día catro incendios distintos nas rúas Fernández Ladreda, Alcalde Hevia e a avenida de Vigo.
O 24 de decembro fora arrestado na confluencia das rúas Cobián Roffinac e Benito Corbal despois de presuntamente plantar lume a colectores de recollida selectiva de papel das rúas Peregrina, Cobián Roffignac e avenida de Vigo. Tras pasar a disposición xudicial, quedou en liberdade con cargos.
Segundo informou a Policía Local, dende este corpo levaban varios días seguindo a pista a unha persoa que se dedicaba a queimar colectores en Pontevedra en horario nocturno. Tras rexistrarse varios incidentes de similares características nos últimos tempos, a madrugada do martes ao mércores estableceuse un dispositivo especial de vixilancia.