As chuvias agardarán ata a vindeira semana para asomarse ás Rías Baixas
Por Redacción
As chuvias non retornarán ás Rías Baixas ata a próxima semana, segundo as previsións do servizo de MeteoGalicia. Está previsto que nos próximos días, a influencia dun anticiclón manteña os ceos lixeiramente anubrados ou despexados.
Este mércores, os ventos de compoñente sur introducirán sensación de humidade a través de nubes baixas e néboas, con temperaturas que apenas sufrirán cambios significativos, con mínimas que se sitúan con mínimas sobre os oito graos e máximas que rozan os 14 graos.
Durante o xoves, os ceos permanecerán anubrados durante a mañá, con apertura de grandes claros ao longo da tarde na zona das Rías Baixas. As temperaturas manteranse sen cambios bruscos con vento frouxo que soprará de sueste.
O anticiclón centrado sobre a península Ibérica manterá un tempo seco e estable durante a xornada do venres prolongándose ata o domingo pola tarde. As temperaturas ascenderán lixeiramente ata situarse sobre os 16 graos centígrados.
Ao longo da próxima semana, o anticiclón irase retirando para permitir a entrada de frontes asociadas ás borrascas que se encontran situadas ao norte, aumentando a probabilidade de precipitacións e estableceranse temperaturas suaves.