Os socialistas piden a inclusión de Vilaboa no futuro transporte metropolitano da ría de Vigo
Por Redacción
A deputada socialista Carmen Gallego esixiulle este martes á Xunta que inclúa ao Concello de Vilaboa nas negociacións do futuro transporte metropolitano da Ría de Vigo. Gallego considera "incomprensible e unha discriminación inaceptable" que a conselleira de Territorio exclúa a Vilaboa.
A deputada socialista pregúntalle á conselleira se as reticencias amosadas a tratar con Vilaboa, deriva de que "non queira outro concello dunha cor política diferente, neste caso socialista, na mesa de negociación do transporte metropolitano".
Animouna a superar o seu "medo" e responder ás continuas chamadas por parte do único concello da ría "ao que a día de hoxe non atendeu".
Gallego lembra que o concello "ten unha grave carencia de transporte público" a pesares de dispor dunha privilexiada situación xeográfica, conectado coa cidade de Pontevedra a través da AP-9 e da N-550 e con Vigo a través da AP-9, coa Ponte de Rande libre de peaxe.
As parroquias de Bértola, Figueirido e parte de Vilaboa, no barrio de Paredes, teñen como principal vía de comunicación a estrada nacional 550, paliando estas graves carencias grazas ao transporte por estrada entre Pontevedra e Vigo.
Sen embargo, a peor parte corre a cargo das parroquias e núcleos de poboación á beira da N-554, que enlaza a Ponte de Rande coa N-550, en concreto San Adrián de Cobres, Santa Cristina de Cobres, Acuña e Toural, que apenas contan cun servizo de transporte público que une Moaña con Pontevedra.