Ponte Caldelas aprobará o xoves un orzamento de 3,2 millóns de euros para 2015
Por Redacción
O Pleno da corporación municipal de Ponte Caldelas aprobará, previsiblemente cos únicos votos favorables do Partido Popular, o orzamento para 2015. Ascenderá a 3.215.381,50 euros, unha cifra lixeiramente superior á deste ano.
No orzamento deste ano, informa o goberno local, adaptáronse as partidas de gastos para manter os servizos básicos municipais, e será un ano en que os investimentos seguiranse financiando principalmente a través dos plans de obras e subvencións doutras administracións.
Así, a través do Plan de Investimentos da Deputación vaise a executar un novo plan de actuacións en materia de saneamiento rural, ademais doutras en materia de mellora de viais, parques públicos e eficiencia enerxética no alumeado público.
Ademais, prevese un plan de investimentos propio do Concello, valorado en 193.000 euros e dos cales 141.000 euros financiaríanse cunha operación de crédito ou con remanentes. Estas últimas actuacións dedicaranse principalmente a investimentos en parques públicos, mellora de viais e eficiencia enerxética no alumado público.
Co peche do exercicio 2014, confírmase a solvencia económica do Concello de Ponte Caldelas rebaixándose así o seu nivel de endebedamento ao 37% dos recursos ordinarios contando xa coa operación prevista para 2015, lonxe do límite do 75% que fixa o Estado, a través do Ministerio de Facenda.
Neste ano o alcalde tamén prevé no orzamento manter as subvencións para as ANPAS e centros educativos do municipio exactamente iguais ás do pasado ano. Igualmente mantense a axuda a COEMPO para a promoción do comercio local e as subvencións ás entidades deportivas do municipio e os colectivos que participan no Plan Cultural.
A maiores prevese, dentro do anexo de subvencións, varias partidas de investimento para melloras de varios centros culturais dalgunhas parroquias de titularidade veciñal. Neste ano 2015 prevense axudas para distintas reformas ou actuacións nas "casas do pobo" de Paradela, Barbudo, Buchabad, Vilarchán e Rebordelo, en función das distintas peticións formuladas polos representantes veciñais destes lugares.