Un comerciante leva o cabreo cos seus veciños ao escaparate da súa tenda
Por Oskar Viéitez
A tenda PXA Body art situada na rúa Laranxo mostra no seu escaparate o cabreo do seu dono cos veciños.
Aínda que o local está especializado en tatuaxes e piercings, tamén se vende roupa e armas. Estas últimas exhíbense no escaparate da tenda xunto ao permiso pertinente da Garda Civil para poder desenrolar tal actividade.
"Teño situado un cartel, ao meu parecer bastante grande, no que se pode ler e entender que temos permiso de intervención de armas da Garda Civil para vender todos e cada un dos artigos que aquí podeis encontrar", explica o dono da tenda, Pedro Pérez.
Pero as katanas, puñais, coitelos ou machetes que alí se mostran non pasan desapercibidos aos transeúntes e nalgún caso provocaron algunha alarma. "Veu a Policía Nacional debido ás queixas de xente que dicía que vendiamos artigos prohibidos. Por suposto comprobaron que non era así", aclara o empresario.
"Só dicir á xente que tanto se queixa que todo o que vendemos é legal", insiste.
Farto de tanta queixa, xunto aos permisos da Garda Civil, este comerciante colgou no seu escaparate un "aviso urxente" no que se le "por favor, se vos sobra tempo e vos aburrides, en vez de tocarme os collóns e intentar entorpecer o meu traballo, subir uns metros máis arriba ata chegar á praza da Ferraría e darlle de comer ás pombas".