Para que serve un alcalde?
Por Redacción
O alcalde de Ponte Caldelas, Perfecto Rodríguez, recibiu no Salón do Plenos do Concello a alumnos de segundo curso de educación primaria do Colexio Cordo Boullosa en véspera do Día da Constitución e someteuse a unha batería de preguntas que xiraron en torno ao seu papel como rexedor e as funcións da institución que representa.
Perfecto Rodríguez insistiu ante os escolares na necesidade de preservar os bens públicos e destacou a importancia que o Concello ten na vida cotiá dos cidadáns do municipio.
Os alumnos, que acudiron á Casa do concello en compañía das súas profesoras, seguiron con atención as explicacións do alcalde quen fixo notables esforzos pedagóxicos para poder trasladar aos nenos unha imaxe comprensible dos distintos servizos e funcións que desempeña a Administración Pública e da importancia que ten para un país democrático dispoñer dunha Constitución.
Para finalizar a visita, Perfecto Rodríguez preguntoulles se consideraban doado ou difícil a tarefa que tiña que realizar un rexedor e se algún tiña interese en ser alcalde cando fosen maiores. Só catro mans alzadas manifestaron o seu desexo de optar no futuro a este cargo de representación.
Tras a fotografía de rigor ante os escanos que ocupan os concelleiros e o alcalde no Salón de Plenos da Casa do concello, os alumnos abandonaron o recinto logo de entrega dun bombón a cada un dos visitantes.