Adeus ao lamazal que unía os núcleos do Xuncal e Vilaseca, en Marín
Por Redacción
Os núcleos de poboación do Xuncal e Vilaseca, en Marín, melloraron as súas comunicacións e accesibilidade. Nos últimos días pavimentouse o camiño que os comunica, unha tarefa que non só facilitan os seus desprazamentos diarios senón que evita que este inverno a zona volva converterse nun lamazal como en anos anteriores.
Segundo informou o Concello de Marín, parte do camiño estaba en terra e resultaba moi incómodo para o uso diario dos veciños da zona, xa que é o único acceso rodado que teñen para chegar ás súas casas.
A outra parte do camiño que xa tiña asfalto estaba moi deteriorado e tanto nunha zona coma na outra estiveron a traballar os medios do parque de maquinaría da Deputación Provincial, de modo que agora todo está visiblemente mellorado. Quedan pendentes pequenos traballos que acometerán as brigadas municipais e que pasan polas tapas e rexistro e reixas.
A alcaldesa, María Ramallo, visitou a zona en compañía de representantes da Asociación de Veciños Ardán e Comarca e do concelleiro de Parroquias do Rural, Pablo Novas. A asociación e os veciños expresaron a súa satisfacción pola mellora que se levo a cabo no lugar e o Concello explicou que decidiu darlle prioridade a esta obra debido á petición dos residentes, que expoñían que en inverno o camiño resultaba un lamazal.