Recepción no Concello a Pedro Trigo, un revolucionario cubano participante no asalto a Moncada
Por Redacción
Pedro Trigo López ten 86 anos. ÿ un revolucionario galego cubano, fillo de emigrantes de Viveiro, que participou no asalto ao cuartel de Moncada onde coincidiu con Fidel Castro e Abel Santamaría. Está en Pontevedra para impartir unha conferencia na facultade de Belas Artes, pero antes pasou polo Concello, onde foi recibido polo alcalde da cidade, Miguel Anxo Fernández Lores.
Xunto ao seu irmán Julio participaron neste asalto, que formou parte dunha acción armada realizada o 23 de xullo de 1953 coa fin de derrocar o ditador Fulgencio Batista. Durante este episodio, ambos foron detidos, e o seu irmán faleceu.
No seu encontro co alcalde, Pedro Trigo lembrou toda a súa traxectoria como un dos líderes da revolución cubana, e Fernández Lores tamén lle manifestou o grande número de fillos de galegos que participaron naquela revolución como Abel Santamaría ou o propio Castro.
Pedro Trigo trasladoulle unha petición ao alcalde de Pontevedra, a posibilidade de coñecer o lugar de nacemento de Efigenio Ameijeiras Delgado, pontevedrés e único sobrevivente dos tres irmáns que participaron na revolución cubana.
Segundo Pedro Trigo, o interese de Efigenio Ameijeiras sempre foi coñecer o lugar preciso de onde era orixinario o seu pai, e determinar se lles quedaba familiar algún en Pontevedra.