A Garda Civil intercepta 36 condutores sen permiso de condución
Por Redacción
A Garda Civil de Tráfico da provincia de Pontevedra sorprendeu, durante os últimos seis meses, 36 condutores co permiso de conducir retirado por sentenza xudicial.
Estas actuacións leváronse a cabo no marco do plan especial de vixilancia da Garda Civil de Tráfico aos condutores perigosos ou reincidentes, en especial sobre os que pesa a retirada do carné, pero tamén aos automobilistas que acumulan varias sancións graves ao volante, como alcoholemias ou conducións temerarias.
Nos últimos seis meses, os efectivos do Destacamento de Tráfico da Garda Civil da Comandancia de Pontevedra monitorizaron un total de 250 persoas que tiñan retirado o permiso de conducir por sentenza penal, dando como resultado a imputación de 36 condutores por un delito contra a seguridade vial, ao ser sorprendidos e interceptados cando conducían sen o permiso de condución ao telo retirado por sentenza xudicial.
Este tipo de condutas ao volante están tipificadas no artigo 384 do Código Penal e levan aparelladas penas de cárcere de tres a seis meses ou multas que van dos 12 aos 24 meses de traballos en beneficio da comunidade, así como o comiso do vehículo para os casos máis graves.
Durante este período de tempo a Garda Civil de Tráfico interceptou na provincia de Pontevedra 36 persoas conducindo co permiso retirado xudicialmente: 8 deles nas estradas do municipio de Pontevedra, e o resto nos municipios de Cambados (5), Vilanova (5), Campo Lameiro (4), Meaño (2), Ribadumia (2) e o resto repartidos entre os municipios de Meis, Poio, Forcarei, Cuntis, Caldas de Reis, etc.
Seis dos condutores imputados circulaban, ademais, superando as taxas máximas de alcoholemia: a tres deles imputóuselles un novo ilícito penal por superar a taxa de 0,60 mg/l en aire e os outros tres fórono pola vía administrativa, outro botou resultado positivo no detector de drogas, sobre outro dos condutores pesaba unha orde xudicial de ingreso en prisión e seis máis carecían de seguro obrigatorio.