Bicis, teles e ordenadores buscan dono na Comisaría
Por Redacción
Nunha sala da Comisaría do Corpo Nacional de Policía de Pontevedra unha serie de obxectos buscan dono. Trátase dos efectos intervidos no marco da operación Lana, na que foron detidos dous veciños de Pontevedra e se logrou desarticular dous puntos negros de venda de estupefacientes na cidade.
O 18 de outubro a Policía Nacional informou da operación e de que con todos os efectos intervidos dos que se sospeita que foran previamente roubados se estaban a levar a cabo as correspondentes dilixencias de investigación ao obxecto de determinar a súa posible ilícita procedencia.
O obxectivo policial era localizar os lexítimos propietarios dos obxectos roubados e, para iso, pregábase a todas as persoas que tivesen sido vítima dalgún roubo que se dirixisen á Comisaría. Pasada unha semana, a maior parte dos obxectos seguen sen recollerse.
Ao respecto, fontes policiais aseguraron que si que se recolleron dous televisores que foran roubados nunha vivenda e un bar e unha cámara de fotos e un ordenador subtraídos noutro roubo. Pero a lista de obxectos que aínda ninguén identificou é longa. Quen os recoñeza e a foto, ten unha cita na Comisaría.
Entre os efectos intervidos figuran un proxector marca ACER, dúas cámaras de fotos marca Nikon, tres televisores marca Samsung, un avisador de radares marca Ángel Driver, unha pistola detonadora marca GM, un radiotransmisor da marca Motorola, unha tablet marca Mastertablet, dous ordenadores marca Asus e Samsung, un patín eléctrico da marca Wagrollen, un cadro de bicicleta marca BH modelo Fighter e unha bicicleta marca BH, modelo Orion.