Mil raios, mil incidencias
Por Oskar Viéitez
A comarca sufriu un regueiro de incidencias debido ás copiosas chuvias, acompañadas de aparato eléctrico, máis de mil raios teñen caido na Comunidade nas últimas horas segundo informou MeteoGalicia.
As trombas de auga provocaron a derruba dun muro que caeu sobre un vehículo estacionado en pleno centro urbano de Vilalonga (Sanxenxo).
Ademais, ás nove da mañá rexistrouse unha saída de vía dun vehículo en Barro cando circulaba pola autoestrada AP-9.
Neste mesmo municipio, ás 18,50 horas, informou o CAE Galicia 112, doutro accidente no que resultaron feridas tres persoas. Tivo lugar na estrada provincial EP-9402, no lugar de Porráns, despois de que o condutor perdese o control do vehículo.
A formación de balsas de auga na calzada obrigou numerosas intervencións na bisbarra, a pesar de que a cantidade de auga acumulada nos pluviómetros da estación de Lourizán non era demasiado significativa, apenas 19,2 litros por metro cadrado.
Outra incidencia da que informaron os membros de Protección Civil de Caldas foi a caida dunha árbore no Nacional 640 ao seu paso por Caldas, concretamente no tramo entre Godos e Saiar.
En Vilagarcía un raio entrou de madrugada do venres nunha casa de Cea e rebentou a súa instalación eléctrica da vivenda e a iluminación pública.
Tamén de madrugada se declarou un incendio nunha vivenda deshabitada de Cambados, situada en Bouza de Padrón, en Oubiña.
Ademais o río Umia desbordou no lugar das Aceñas, entre Meis e Vilanova de Arousa. A enchente non afectou a vivendas nin a empresas próximas, pero si a campos de cultivo, viñedos, o parque de ocio e a senda fluvial.