80 persoas condenadas a servizos en beneficio da comunidade cumpriron a súa pena en centros da Deputación
Por Redacción
A Deputación de Pontevedra acollerá este xoves unhas xornadas sobre "A xestión da pena de traballos en beneficio da comunidade", na que participarán traballadores sociais, responsables de entidades sociais e diferente persoal técnico de concellos e asociacións que colaboran co Ministerio de Interior no programa de medidas alternativas á prisión.
O obxectivo é explicar polo miúdo os procedementos específicos da xestión das condenas a traballos en beneficio da comunidade a aquelas institucións e organismos que na actualidade colaboran neste labor e animar aos que aínda non participan nos programas a sumarse a eles.
Na provincia de Pontevedra son 60 os concellos que participan nesta iniciativa, así como a Deputación de Pontevedra e máis de medio cento de entidades sen ánimo de lucro.
A Deputación de Pontevedra leva colaborando neste programa, por medio dun convenio marco co Centro Penitenciario de A Lama, desde o ano 2009, facilitando o cumprimento das súas condenas neste tempo a 80 persoas, con resultados moi satisfactorios.
Cada ano son unhas 15 as persoas que se destinan a diferentes centros da Administración Provincial: Príncipe Felipe, Servizo de Patrimonio Documental, Museo ou Areeiro son algúns deles, onde desenvolven sobre todo labores de mantemento e limpeza.
Os resultados desta colaboración entre o Ministerio de Interior e os concellos da provincia serán analizados na xornada, que se encargará de abrir o subdirector xeral adxunto de Penas e Medidas Alternativas, Miguel Ángel Vicente Cuenca.
A xornada terá lugar entre as 10:00 e as 14:00 horas, no salón de actos do Edificio Administrativo da Deputación de Pontevedra.