Cinco proxectos tecnolóxicos de colexios pontevedreses participan en Galiciencia 2014
Por Redacción
O Colexio Internacional SEK-Atlántico, o CPR Santiago Apóstolo e o CPI Mosteiro-Meis son os tres centros pontevedreses que participarán na edición deste ano de Galiciencia entre o 19 e o 21 de novembro nas instalacións do Parque Tecnolóxico de Galicia en Ourense.
Desta forma, o SEK-Atlántico presentará tres proxectos, un deles consiste nunha proba experimental de condución segura a base de sensores de robótica cun prototipo de coche que realiza unha acción segundo a cor que detecta, por exemplo, nun semáforo. Tamén un sensor de ultrasóns permite que se detecten obstáculos, obrigando ao robot a deterse se se encontra a unha distancia determinada. Outra iniciativa deste centro analiza se os videoxogos son beneficiosos para a capacidade de concentración e os alumnos demostran que así é tras realizar un estudo. O terceiro proxecto deste centro comproba que unha gran cantidade de alimentos conteñen ferro, entre outros nutrientes, e mostra como no caso dos cereais do almorzo é posible separalo cun imán.
Pola súa banda, o CPR Santiago Apóstolo presenta unha proxecto con gomas de borrar con distintas masas para despois tomar medidas e o estiramento que se produce e poder reproducir os datos en gráficas e táboas.
Por último, alumnas do CPI Mosteiro-Meis mostrarán cunha investigación os impactos ambientais máis importantes que afectan ao río de San Tomé que pasa por Meis analizando parámetros fisicoquímicos e biolóxicos e avaliando como afectan as actividades humanas e as orixes das principais perturbacións.