O Concello de Sanxenxo investirá máis de 6.000 euros no cambio de drenaxe das Telleiras
Por Redacción
O goberno local de Sanxenxo confirmou este martes 11 que dispón dun orzamento destinado a solucionar os problemas de filtracións que padece o Centro de Interpretación As Telleiras, situado na parroquia de Vilalonga. Tal e como explicou o concelleiro de Obras e Infraestruturas as acusacións a emprender neste equipamento municipal contempla a substitución da drenaxe.
O concelleiro Tino Sanmartín indicou que o centro está situado nunha zona intermareal, situada a nivel do mar, polo que a coincidencia de preamar e chuvias abundantes provoca un aumento do nivel freático que deriva en filtracións no edificio.
Durante os últimos anos realizáronse diversas intervencións para evitar as humidades, como a limpeza de canos, tellados, baixantes, tubaxes de recollida de pluviais, entre outras obras. Pero non se conseguiu acabar co problema derivado do emprazamento.
O concelleiro realizou varias inspeccións cos técnicos municipais e dediciuse mellorar a drenaxe como posible solución ás filtracións. Esta intervención conta cun orzamento que ascende a 6.223 euros, executarase de forma inmediata en canto supere a fase de fiscalización.
As accións que se van realizar contemplan a excavación en terreos de consistencia branda por medios mecánicos ata unha profundidade de 60 centímetros, o subministro e colocación de fondo de formigón e de arqueta de rexistro realizada con ladrillo oco dobre. As obras incluirán a instalación de tubaxe de drenaxe de pvc e cuberta con tela tipo xeotéxtil; e de dotación de tubaxe de pvc de 250 milímetros de diámetro para a saída do rebosadeiro, así como unha válvula antiretorno que favorece a saída pero impide que entre auga no momento en que sube o nivel.