Greenpeace inclúe un barco de Marín nunha lista cos 20 pesqueiros máis destrutivos de Europa
Por Oskar Viéitez
Greenpeace lanzou este martes un informe onde publica a lista con 20 dos barcos de pesca europeos máis destrutivos, "sobredimensionados e prexudiciais para os océanos do planeta", entre os que se encontran os arrastreiros de fondo, Praia de Tambo, de Marín e o Eirado do Costal, de Cangas.
En total son cinco buques con bandeira española.
No informe Monster Boats. Unha eiva para os océanos, preséntanse os barcos que supoñen a "punta do iceberg" dos navíos que faenan baixo bandeira de países da Unión (ou cuxos propietarios ou xestores son comunitarios) e que segundo Greenpeace deberían ser retirados dos mares para rematar co problema de sobrecapacidade de pesca que sofre Europa e, en consecuencia, paliar a sobrepesca en todo o mundo.
"Os países europeos, especialmente España, teñen unha capacidade de pesca superior ao que os océanos poden asumir, e a única solución é recortar a frota, polo que á hora de facelo, pedimos aos gobernos que empecen cos barcos máis daniños como os desta lista", declarou Marta González, responsable da campaña de Océanos de Greenpeace.
Os ecoloxistan lembran que a sobrepesca é un problema mundial con consecuencias alarmantes e indiscutibles: o 90% das poboacións de peixes están sobreexplotadas. Organizacións como a ONU advertiron en repetidas ocasións da difícil situación das poboacións de peixes e identificou o exceso na capacidade de pesca como un factor crítico do esgotamento dos recursos. Algúns segmentos da frota europea teñen unha capacidade de pesca de dous a tres veces maior que o nivel considerado como sostible.