As fortes chuvias volven asolagar varias rúas de Vilagarcía de Arousa
Por Redacción
Varias rúas do concello de Vilagarcía de Arousa no tramo cara a Carril volveron inundarse durante a xornada deste luns con motivo das fortes precipitacións rexistradas durante a mañá.
Foi necesaria a intervención dos Bombeiros do Parque de Vilagarcía nas rúas Patio Saavedra, Santa Lucía e Colón. Os bombeiros tiveron que desatascar os canos e a rede de sumidoiros para que a auga puidese encontrar saída.
Segundo informaban dende o Parque de Bombeiros, as fortes precipitacións coincidiron coa marea alta provocando un problema habitual nesa zona próxima á ría.
A presenza de auga nas rúas non provocou incidencias destacables no tráfico.
En Pontevedra, os bombeiros tiveron que cortar varias pólas de árbores que se desprenderan na zona próxima ao río Lérez ao longo da Avenida de Bos Aires, sen que se produciran danos de consideración.
A chuvia deixou máis de 65 litros por metro cadrado, segundo os datos ofrecidos pola Estación da Armenteira durante esta xornada.