O venres 31 volverán as borrascas ás Rías Baixas
Por Redacción
As borrascas achegaranse de novo a Galicia a partir do próximo venres con altas probabilidades de que durante a fin de semana a chuvia faga presenza a partir da xornada do venres 31 ao mediodía.
Segundo informa o servizo de MeteoGalicia tratarase de frontes pouco activas, de maneira que se presentará unha chuvia intermitente e non moi intensa. Ao mesmo tempo, as temperaturas comezarán a descender coa chegada do mes de novembro situándose máis preto dos 15 graos centígrados que dos 20. A máis longo prazo, espérase por MeteoGalicia, que pouco a pouco o anticiclón poida ir recuperándose durante a vindeira semana.
Ao longo destes días de finais de outubro, a situación nas Rías Baixas permanecerá nunha área intermedia entre as baixas presións do Atlántico e o anticiclón que aínda se situará sobre a parte oriental de Europa. Ante estas condicións, este martes 28 e tamén o mércores 29 serán unhas xornadas de intervalos de nubes alternando con momentos de claros e as temperaturas non experimentarán cambios significativos. O vento soprará frouxo de compoñente sur.
Tamén o xoves continuará soprando vento do sur que achegará aire relativamente cálido. As baixas presións que se localizarán entre Azores e Irlanda introducirán humidade nas capas altas da atmosfera que provocarán intervalos de nubes de tipo alto no ceo impedindo o paso do sol.