Sorprenden "in fraganti" a tres mozos cando intentaban roubar no Club de Piragüismo da Illa de Arousa
Por Redacción
A Garda Civil detivo tres persoas, dous mozos de 22 e 20 anos e un menor de idade, todos eles veciños da Illa de Arousa, como supostos autores dun delito de roubo con forza en grao de tentativa e outro de danos.
Segundo informaron fontes oficiais do Instituto Armado, os feitos aconteceron na madrugada deste luns, día 27, cando unha patrulla de seguridade cidadá do posto da Garda Civil de Vilagarcía de Arousa sorprendeu no interior do Club de Piragüismo da Illa de Arousa a tres mozos que, con anterioridade forzaran a porta para poder acceder ao seu interior.
Os tres detidos, un deles resultou ser menor de idade, foron conducidos ás dependencias oficiais da Garda Civil onde se instruíron as correspondentes dilixencias nas que se lles imputa tamén un delito de danos ao ter ocasionado a rotura dun panel publicitario.
Os dous mozos, que carecen de antecedentes policiais, serán entregados no Xulgado de Instrución número dous de Vilagarcía de Arosa, mentres que as dilixencias relativas ao menor se remitirán á Fiscalía de Menores.