Arde un galpón cheo de alpacas de herba e apeiros de labranza en Bemil (Caldas de Reis)
Por Redacción
Un incendio nun galpón situado na parroquia de Bemil (Caldas de Reis) mobilizou esta madrugada os servizos de emerxencia.
O suceso tivo lugar sobre as 00.34 horas. Ese foi o momento no que o 112 Galicia recibiu unha chamada na que se alertaba do incendio. Por causas que se investigan comezou a arder este galpón, que estaba cheo de alpacas de herba e diferentes apeiros de labranza.
As chamas non afectaron nin ás casas lindantes nin tampouco aos animais.
Ao lugar do incendio desprazáronse os Bombeiros do Salnés, a Policía Local de Caldas, o GES de Valga e membros das agrupacións de Protección Civil de Caldas e Cuntis. Todos eles estiveron a traballar na zona por espazo dunhas dúas horas.
Ademais, acudiu unha patrulla da Garda Civil, corpo que se fixo cargo das investigacións sobre este suceso.