Os veciños "queren saber" a través dunha xornada de debate no Pazo da Cultura
Por Redacción
O presidente da Confederación de Federacións veciñais galegas (Cogave), Eladio Fernández, e o presidente da Federación de Veciños Castelao, Verísimo Pazos, anunciaron a celebración o vindeiro sábado 25 dunha xornada de debate no Pazo da Cultura baixo o título "Os veciños queremos saber". Neste encontro trataranse temas como os asuntos sociais, a educación, a sanidade e o emprego.
Verísimo Pazos lamentou que ningún membro da Xunta de Galicia teña aceptado a invitación para asistir a esta cita e poder explicar a postura da administración autonómica en relación cos asuntos que se van tratar nos debates. Sinalan que ao redor dun cento de persoas de diferentes colectivos participarán eneste encontro no que a entrada é libre.
A primeira mesa vai iniciarse ás 10.00 horas do sábado cunha análise sobre a educación en Galicia. Verísimo Pazos indicou que ao longo da xornada está previsto que asistan o presidente da Deputación, Rafael Louzán, a concelleira de Asuntos Sociais, Carmen Fouces e a de Emprego, Carlota Román.
Eladio Fernández, pola súa parte, sinalou que intentarán que sexa unha xornada produtiva na que se amosen as inquedanzas dos cidadáns para extraer conclusións e trasladalas posteriormente a través dun informe as distintas administracións. Apuntou que o movemento social está preocupado polas lagoas de pobreza, o paro e os problemas de recortes que lles afectan. Recalcou que as administracións "teñen que escoitar" os cidadáns para despois buscar solucións.