Na procura de universitarios que den o cante
Por Redacción
O Campus de Pontevedra careceu ata o de agora dunha formación vocal. Desde a Área de Extensión Cultural traballan para que o Coro do Campus de Pontevedra poida ser unha realidade nos próximos meses. Por ese motivo, convocan tanto á comunidade universitaria como a toda a cidadanía a unha proba de voz o vindeiro martes 21, de 17.00 a 20.00 horas, na Facultade de Ciencias da Educación e do Deporte.
O que será o director do futuro coro, o profesor Marco Lucato, será o responsable de coordinar unha proba que se desenvolverá na aula de música do centro e que non irá dirixida a decidir quen pode cantar no coro e quen non, segundo salienta Manuel Morquecho, responsable de Extensión Cultural no campus. Todo o contrario, a filosofía desta iniciativa, aberta a todos os membros da comunidade universitaria e que destinará ademais o 25% das súas prazas, como máximo, ás persoas alleas a institución académica interesadas en sumarse ao proxecto, é que estea aberta a todo o mundo.
Nin hai que saber de música nin ter unha gran voz, calquera persoa pode cantar, só fai falla ter ganas de divertirse, subliña Morquecho, que explica que o obxectivo desta proba é simplemente o de coñecer o rexistro vocal daquelas persoas están interesadas en pasar a formar parte dunha agrupación inicialmente pensada para un máximo de 40 voces.