Os comuneiros de montes piden a dimisión da conselleira de Medio Rural "por incompetencia"
Por Redacción
Os responsables dos montes veciñais volven solicitar a condonación do que entenden son "falsas débedas" coa administración que se lle reclaman e piden convenios ou consorcios, ademais dun plan presupostario que poña en valor os montes galegos coa intención de que se convertan en multifuncionais.
Xosé Alfredo Pereira, presidente da Organización Galega de Comunidade de Montes Veciñais en Man Común, e Claudio Quintillán, portavoz do colectivo, sinalaron que é necesario que a Xunta de Galicia proceda ao deslinde de todos os montes, ademais de esixirlle unha fiscalidade propia para os montes veciñais galegos, ao mostrarse contrarios ao imposto de Sociedades.
Reclamaron a principios deste verán unha reunión coa conselleira de Medio Rural, Rosa Quintana, sen obter resposta. Ante este silencio, os comuneiros decidiron pedir a dimisión da conselleira e están a trasladar esta solicitude aos diferentes grupos parlamentarios.
Ademais, os comuneiros celebrarán tres asembleas coas comunidades de montes de Caldas o venres 24 e, ao día seguinte, desenvolverase en Ponte Caldelas. Tamén se vai celebrar outra para as comunidades de Pontevedra o 29 de outubro. O 22 de novembro desenvolverase unha manifestación en Santiago de Compostela.