Entra nunha clínica de fisioterapia, mete a man na caixa, colle 120 euros e sae correndo
Por Redacción
Un veciño de Pontevedra de 36 anos foi detido este mércores como suposto autor dun furto nunha clínica de fisioterapia da rúa Eduardo Pondal da que se tería levado 120 euros en metálico antes de saír correndo.
Os responsables do establecemento relataron á Policía Nacional que un individuo accedeu ao interior do local sobre as 11.00 horas, meteu a man no caixón da caixa rexistradora e apropiouse duns 120 euros, tras o cal saíu fuxindo á carreira.
Tras sorprender o ladrón, os responsables puxéronse en contacto cunha patrulla da Policía Nacional que estaban a realizar labores de prevención da seguridade cidadá polas inmediacións da rúa Filgueira Valverde, a poucos metros do establecemento, para indicarlles o que remataba de suceder.
Os axentes solicitaron datos deste individuo e iniciaron un dispositivo de busca para tratar de localizalo. Interceptárono na rúa Antón Fraguas e, ao ser identificado, recoñeceu ter subtraído o diñeiro.
Os axentes procederon á identificación do home, con antecedentes policiais, como presunto autor dunha falta de furto e o seu posterior traslado a dependencias policiais. Entregóuselle unha citación para a celebración dun xuízo rápido de faltas.