Morren Celestino Pichel e Dalmiro Blanco, dous pontevedreses de referencia na emigración galega
Por Redacción
Dúas personalidades pontevedresas, de referencia no colectivo emigrante galego en Sudamérica, acaban de morrer en Montevideo (Uruguay) e Salvador de Bahía (Brasil).
Celestino Pichel Bouzas (Viascón- Cotobade 1926), o gaiteiro máis lonxevo de América, faleceu o pasado 6 de outubro na capital uruguaia e Dalmiro Blanco, natural de Pontecaldelas e conselleiro vitalicio da Asociación Cabaleiros de Santiago e presidente do Hospital Español de Salvador de Bahía no periodo 2004-2007, morreu o pasado xoves, día 9 de outubro, na cidade brasileña, segundo información facilitada pola Deputación de Pontevedra.
O presidente da Deputación de Pontevedra, Rafael Louzán, e os alcaldes de Cotobade e Ponte Caldelas, Jorge Cubela e Perfecto Rodríguez, manifestaron o seu pésame ás respectivas familias.
Louzán lembrou que Pichel foi Premio Entreculturas da Deputación de Pontevedra no ano de 2009 pola súa extraordinaria laboura en pro da cultura galega no Uruguay e en todo América do Sur.