Un preso da Lama perde vinte quilos tras máis dun mes en folga de fame por supostos malos tratos
![Redacción](/web/cache/scene/uploads/xornalistas/foto/_S7QytKoutjK3UsovKMnMzytWsi62MjSxUqrKz891Lsov0DEyAC_/_Il61oA_/506490f5a15ce-c6ku5opwb5qbtijalxd0_reasonably_small.jpeg)
Por Redacción
Un preso do Centro Penitenciario da Lama perdeu 20 quilos durante unha folga de fame por supostos malos tratos, segundo asegura o seu avogado nun comunicado difundido polo Observatorio para a Defensa dos Dereitos e Liberdades.
O recluso Emilio Sánchez del Peso, alcumado "el rockero" leva desde o pasado 14 de agosto en folga de fame en protesta polos supostos malos tratos e torturas que ao seu entender reciben os presos do módulo de illamento da prisión pontevedresa.
O "rockero" leva desde o pasado 14 de agosto en folga de fame
Malia o avanzado deterioro do seu estado de saúde -pasou de 73 a 53 quilos dende o inicio da protesta- ainda non foi trasladado á enfermería nin ao hospital, informa o seu avogado Raúl López.
Integrante da Campaña Cárcere = Tortura, iniciativa de loita e difusión contra os malos tratos na cadea, Sánchez del Peso non reivindica nada para si propio. Pola contra, o seu obxectivo é "a divulgación da vulneración de dereitos fundamentais que acotío se producen nas prisións do estado español e, moi especialmente, nos módulos de illamento" afirma unha activista da campaña.
"Debemos contextualizar o protesto após o falecemento repentino do preso Eugenio García Serrano, alias Gaviotu, nese mesmo módulo de illamento de A Lama", prosegue , caso polo que un familiar xa iniciou investigacións para esclarecer os feitos.
Pola súa banda, o letrado subliña que, ainda que Del Peso se atopa en prisión por pequenas condenas, leva máis de 10 anos clasificado en primeiro grado.