Os viticultores de Rías Baixas fixan os custes de producción entre 1,10 e 1,25 euros o quilo de uva
Por Oskar Viéitez
As organizacións agrarias Sindicato Labrego Galego, Xóvenes Agricultores e Unións Agrarias acordaron na mesa de traballo conxunta fixar os custes de produción nas explotacións da Denominación de Orixe Rías Baixas nunha franxa que vai de 1.10 euros a 1.25 euros por quilo de uva, dependendo da morfoloxía da explotación, as amortizacións ou o modelo de traballo.
Con este acordo os viticultores entenden que se dá resposta a proposta acordada nunha reunión co secretario xeral de Agricultura, Tomás Fernández Couto, a pasada semana para evitar que os produtores teñan que vender con perdas a súa produción.
No citado encontro o representante da Xunta manifestou o seu compromiso de traballar fortemente polo sector, establecendo dende principios do ano que ven un marco regular e de traballo con todos os axentes do sector que permita definir o futuro que debe seguir este sector tan importante nas comarcas que abarca a DO Rías Baixas, e ao mesmo tempo, el compromiso de definir un estudo de custes de produción pormenorizado que sexa referente para a totalidade da cadea alimentaria.
Tal como se acordou no encontro entre os produtores, as adegas e o representante da Consellería de Medio Rural é "imprescindible" a aplicación da normativa que establece a Lei da Cadea Alimentaria en tanto que impide a venta de uva sen contrato homologado, "algo que neste momento dista moito ser unha realidade para os viticultores de Rías Baixas", valoran nun comunicado as tres centrais sindicais.
Desde as organizacións agrarias lémbrase que a viabilidade do modelo de produción na denominación de orixe depende totalmente da estabilidade económica das explotacións e das garantías xurídicas que protexan a comercialización da produción.
A imaxe e o posicionamento da D.O. "débese ao bo traballo conxunto de tódolos elos da cadea. Unha cadea que debe representar ao equilibro na rendibilidade tanto para as adegas como para os viticultores e nas garantías de cobro da produción", conclúen.
Relacionadas:
-
Viticultores de Rías Baixas levan sen cobrar as súas uvas dende a colleita de 2011
Por Natalia Puga |
-
Os viticultores farán 'escrache' ás adegas que compren uva por debaixo do prezo de produción
Por Oskar Viéitez |
-
Entre 20 e 25 millóns de quilos de uva, previsión para a vendima na D.O. Rías Baixas
Por Redacción |