A nova lonxa de Portonovo está pensada para os turistas
Por Oskar Viéitez
A nova lonxa de Portonovo é un edificio máis accesible á cidadanía, en concreto aos turistas que desexen coñecer parte da cultura mariñeira do municipio de Sanxenxo.
Inclúe unha zona de visitas, que permite a convivencia entre o turismo e a actividade das instalacións sen alterala e mellora a imaxe do conxunto do porto.
A reforma foi cofinanciada pola Unión Europea a través do Fondo Europeo de Pesca nun 75% e a Xunta aportou o resto ata chegar aos 2.014.310 euros.
A conselleira do Medio Rural e do Mar, Rosa Quintana e a alcaldesa de Sanxenxo, Catalina González, visitaron este luns as novas instalacións destacando a súa modernidade polo uso que fai das novas tecnoloxías, pois conta cun sistema de subhasta automático, que favorece o traballo dos profesionais do mar.
Outra das vantaxes das novas instalacións é o sistema de iluminación a través de luminarias LEDs, o que favorece a eficiencia enerxética logrando un importante aforro no consumo eléctrico.
O edificio da lonxa ten forma rectangular cunha superficie construída en planta de 1.878 metros cadrados que inclúen a sala de subhastas, a cámara frigorífica e o sistema de subhastas automatizado, as oficinas dos servizos veterinarios e as instalacións de servizo (salas de comiso e de residuos).
A segunda zona é a área de xestión e servizos de lonxa, formada polas oficinas de lonxa, os vestiarios para o persoal da lonxa e a zona de almacén de materiais e equipos, cuartos de instalacións e sala multiusos. A terceira está composta polos locais de servizo da actividade na lonxa e portuaria que inclúen a oficina de Portos de Galicia, os servizos xerais e o acceso á cafetería.