Prisión comunicada e sen fianza para o Nani polo tiroteo de Vilaxoán
Por Oskar Viéitez
O xulgado de Vilagarcía decretou prisión provisional comunicada e sen fianza, para Serafín P.N., coñecido polo alcume de 'O Nani', o individuo que o pasado luns resultou ferido nunha perna tras recibir dous tiros no medio dun forcexo coa Policía Nacional que o ía deter.
Segundo informan fontes do Tribunal Superior de Xustiza de Galicia, impútanselle dous delitos, un contra a saúde pública e outro de atentado contra os axentes da autoridade.
O Nani acudiu este mediodía ata o edificio dos xulgados tras pasar a noite nos calabozos da Comisaría de Vilagarcía, xa que pediu a alta voluntaria no Hospital de Montecelo onde foi atendido polas feridas sufridas na súa perna dereita por dous impactos de bala.
O incidente tivo lugar este luns cando policías nacionais de paisano foron a unha vivenda da rúa Rosaleda de Vilaxoán, para deter o presunto narco vilanovés de 45 anos no marco dunha operación contra o narcotráfico.