Presentan un proxecto de reordenación do casco histórico de Combarro que inclúe a construción dun hotel
Por Oskar Viéitez
O Salón de Plenos do Concello de Poio acolleu este mércores a presentación dos traballos incluídos no proxecto de "Desenvolvemento dos traballos teóricos e de investigación en emprazamentos de interese urbano e histórico de Combarro" realizado polo alumnado da Universidade da Coruña no marco do convenio asinado polo Concello.
Entre os elementos máis destacados o traballo propón o proxecto de construción dun pequeno hotel no casco histórico de Combarro. A súa situación será na parcela delimitada dentro do ámbito delimitado polo Plan Especial e en contacto co tecido histórico da vila, para que os seus usuarios habiten, usen e gocen de xeito inmediato este conxunto de alto valor patrimonial. Por iso é recomendable dispoñer un dobre acceso: un prioritariamente peonil, directamente vinculado ás rúas e ao bordo do mar, e outro para vehículos (cun pequeno aparcadoiro) pola zona interior (obxecto de ordenación na materia de urbanismo).
Un pavillón (independente ou non) aloxará unha Sala Multiúsos, na que se poderán celebrar diversos tipos de eventos, tales como congresos, banquetes, concertos, etc. Esta sala poderá ser divisible e contará cos servizos necesarios para acoller estes usos.
A parcela proposta ten 3.000 metros cadrados de superficie e dá fronte a A Rúa, e inclúe un edificio de recente construción que deberá ser substituído con algún dos servizos que comprende o programa do hotel, ademais de conservar e potenciar o acceso ao ámbito das hortas existente na actualidade.
PROXECTO DE ORDENACIÿN
Ademais presentouse un proxecto de ordenación que xorde da necesidade de mellorar os accesos ao núcleo histórico e ao edificio hoteleiro proposto así como de dotar a este ámbito de equipamentos e espazos verdes públicos.
Formúlase un grande eixe peonil que comunica a estrada co Combarro histórico perpendicularmente ao mar, rompendo a impermeabilidade das edificiaciones en torno á estrada fronte á parte histórica.
Co obxectivo de desviar parte do tráfico do actual acceso na parte sur por ser este o único próximo a lugares de estacionamento créanse espazos de aparcadoiro para residentes no núcleo adheridos aos espazos verdes, co incentivo da inmediatez destes e dos camiños peonís.
Ademais reparcélase o espazo de hortas interiores, tendo en conta a disposición das edificacións existentes nos bordos históricos. Ao sur proxéctanse dúas mazás con edificación residencial á vez que se manteñen, envolvendoa nun espazo verde. En torno ao eixe peonil sitúanse os equipamentos públicos: biblioteca, centro social, zona de mercado e aluguer de aparellos de pesca e de agricultura, enfocada esta á horta comunitaria.
Tras reflexionar sobre a invasividade que xera o sector do turismo, a formulación xeral pretende dotar de continuidade ao "Combarro novo" e ao "Combarro turístico" ofrecendo espazos de desfrute tanto para o visitante como para o que o habita día a día.