Entran polo campanario e rouban o peto da igrexa de Ardán
Por Redacción
O cura párroco de Santa María de Ardán, en Marín, presentou unha denuncia na Comisaría do Corpo Nacional de Policía para dar conta dun roubo rexistrado supostamente durante a noite deste martes a este mércores no interior da igrexa, do que se terían levado todas as esmolas que había no peto.
Segundo indicaron fontes coñecedoras do caso, o home acudiu á Comisaría este mércores pola tarde e relatou que el se dera conta do sucedido este mércores e que necesariamente todos os feitos tiveron que pasar dende última hora da noite do martes ata a mañá.
Segundo explicou o cura, o autor ou autores do roubo entraron polo campanario e, unha vez no interior, baixaron polas escaleiras internas, substraeron os cartos do peto e saíron ao exterior pola porta principal. En diñeiro recadado rolda os 75 euros.
A Policía Nacional abriu unha investigación para aclarar o sucedido e localizar o autor ou autores do roubo.