Agustín Fernández pide un debate local ao PP sobre a reforma electoral
Por Redacción
O secretario xeral do PSOE pontevedrés, Agustín Fernández, pediu ao Partido Popular un debate "público e aberto" sobre a reforma electoral proposta polo presidente do Goberno, Mariano Rajoy, para que o alcalde sexa o máis votado aínda que non teña maioría absoluta.
Agustín Fernández empraza a este debate ao grupo local do PP, pero se estes non aceptan a proposta, mostrouse interesado en debater co presidente provincial da formación conservadora e presidente da Deputación, Rafael Louzán.
"Onde eles queiran e como queiran", dixo o voceiro socialista durante a presentación do programa de accións que o PSOE puxo en marcha para mostrar o seu rexeitamento á reforma electoral "porque atenta contra os principios democráticos", e que inclúe a presentación de mocións nos plenos municipais de todos os concellos da provincia, así como no da Deputación.