Aborda un mozo, bótalle as mans ao pescozo, tírao ao chan e tíralle a carteira
Por Redacción
A Policía Nacional detivo un mozo veciño de Redondela por supostamente abordar un mozo en plena rúa e, sen mediar palabra, botarlle as mans ao colo e tiralo ao chan para, tras un forcexo, roubarlle a carteira. Dáse a circunstancia de que ese asalto foi o segundo delito contra o patrimonio que se atribúe ao mesmo individuo no mesmo día, pois presuntamente horas antes subtraeu ao descoido a carteira dunha muller nunha terraza.
En relación co delito de roubo con violencia, produciuse sobre as 23.45 horas do mércores 3 de setembro na rúa Eduardo Pondal. A presunta vítima foi un mozo que estivera a tomar algo no establecemento La Tienda de Clara e, cando saíu e pretendía acceder ao garaxe, foi abordado.
Tras botarlle as mans ao pescozo e tiralo ao chan, iniciouse un forcexo durante o cal lle arrebatou a carteira que levaba no peto da camisa e se apoderou do diñeiro que contiña, 150 euros. A continuación abandonou o lugar e deuse a alerta do sucedido á Policía Nacional.
Unha patrulla desprazouse ata Eduardo Pondal para contactar coa presunta vítima e iniciouse un dispositivo de busca para tratar de localizar o presunto autor. Minutos máis tarde, a media noite, localizouse no polígono do Vao un individuo que se correspondía coas características físicas achegadas pola vítima e levaba enriba o diñeiro que acababa de subtraer.
O mozo, veciño de Redondela de 30 anos con antecedentes policiais, foi detido como presunto autor dun delito de roubo con violencia. Nese momento, os axentes constaron que o rapaz cometera esa mesma tarde outro feito delituoso.
Este primeiro roubo produciuse sobre as 17.45 horas. Unha muller esta tomando algo nunha terraza, deixou sobre a mesa unha carteira na que levaba 85 euros e a documentación persoal e un individuo chegou, colleuna e saíu correndo con ela. A Policía localizouno na ponte da Barca e, tras identificalo, citárono para un xuízo rápido por furto.