Precinto e desaloxo voluntario dos apartamentos turísticos Playa Canelas
Por Redacción
Os apartamentos turísticos Praya Canelas, en Sanxenxo, volveron ser precintados este mércores en cumprimento da sentenza firme que anula as licenzas de obra e de actividade e obriga a súa demolición. O precinto realizárono técnicos do departamento municipal de Urbanismo e efectivos da Policía Local.
Os técnicos e axentes instaron o propietario a que procedese ao desaloxo voluntario do inmoble. O proceso desenvolveuse sen incidentes, pois o dono se mostrou colaborador. A pesar de que o negocio foi precintado o pasado mes de outubro, tras clausurarlle a actividade, Urbanismo tivo que requirir varias veces ao responsable dos apartamentos turísticos o cumprimento desta orde, á que fixo caso omiso en reiteradas ocasións, como ratificou a Policía Local. Non obstante, este mércores colaborou.
Dende o Concello recordaron que os promotores deste negocio tramitaran no seu momento as autorizacións municipais necesarias para levantar un edificio composto por semisoto, planta baixa e dous pisos pero, debido a que o construído non se axusta á legalidade vixente, os apartamentos non dispoñen dos permisos obrigatorios para a súa explotación.
A Xerencia Municipal de Urbanismo xa ordenou en xuño de 2011 a demolición do inmoble e a clausura da actividade, en cumprimento do fallo do Xulgado do Contencioso-Administrativo número 1 de Pontevedra, que foi confirmado pola sección número 2 da Sala do Contencioso-Administrativo do Tribunal Superior de Xustiza de Galicia.