Traballan na mellora do pavillón do Sequelo e na construción dunha cancha para o colexio de Seixo
Por Redacción
As reformas previstas nos centros educativos de Marín seguen o seu curso coa intención de estar concluídas antes do inicio do curso escolar.
Entre os traballos que se están a realizar destaca a construción dunha cancha deportiva no colexio de primaria de Seixo. A pista será de formigón e permitirá a práctica de deportes como o fútbol sala ou baloncesto, ademais doutras modalidades que non se podían practicar neste ámbito.
A intención do goberno local é que, ao igual que noutros centros escolares, esta instalación poida utilizarse tamén fóra do horario lectivo.
Por outra parte estes días estase a proceder a instalar a pista de madeira do pavillón do Sequelo, dentro das obras adxudicadas no seu momento pola Deputación á empresa Mondo Ibérica por valor de 55.600 euros.
Esta reforma mellorará o uso dunha instalación que é utilizada en horario matinal polo colexio de primaria do Sequelo e polas tardes polas diferentes actividades extraescolares.