Deteñen o xerente dun bar de Sanxenxo como presunto vendedor de cocaína
Por Redacción
O xerente dun bar de Sanxenxo, A.I.P.F., de 29 anos de idade e veciño da vila turística foi detido nas últimas horas como presunto autor dun delito contra a saúde pública por tráfico de droga a pequena escala.
A Policía Local e a Garda Civil do posto de Sanxenxo realizaron unha actuación coordinada de control dos establecementos de ocio nocturno durante a fin de semana que levou á inspección dun bar situado no centro da vila. No interior do establecemento, os axentes incautáronse de dúas caixas metálicas pequenas con quince doses de cocaína dispostas para a súa venda. No interior da caixa rexistradora, nun compartimento non visible, localizouse outro envoltorio máis de cocaína. Tamén encontraron unha balanza de precisión e gran cantidade de diñeiro. A Garda Civil fíxose cargo do detido que xa pasou a disposición xudicial.
As forzas da orde constataron a presenza de numerosos menores consumindo alcohol rexistrándose un coma etílico mentres se encontraban nesa zona, que levou a que unha menor tivese que ser atendida no P.A.C. de Baltar, polo que a Policía Autonómica promoveu unha denuncia contra o negocio.
Durante as madrugadas do venres, sábado e domingo, os axentes municipais realizaron un total de 126 controis do horario de peche dos locais de ocio e cursaron tres denuncias polo seu incumprimento a un pub situado no Porto Deportivo de Sanxenxo e a outro situado en Portonovo. O informe de actuacións elaborado pola Policía Local reflexa tamén que o pasado fin de semana, un dos de maior afluencia ao municipio de todo o verán, se produciu unha pelexa na madrugada do sábado en Portonovo e varias denuncias por celebrar botellón tanto nesa vila coma en Sanxenxo.
Na noite do sábado ao domingo os axentes foron increpados polo que cursaron dúas denuncias que remitiron á Subdelegación do Goberno e realizaron un requirimento por queixas veciñais dunha festa privada.
DETENCIÿNS NO GROVE
A Garda Civil detivo A.M.P., de 23 anos de idade e a F.D.O., de 40, ambos os dous veciños do Grove, como supostos autores dun delito contra a saúde pública por tráfico de drogas a pequena escala. Na madrugada deste luns, compoñentes do Posto da Garda Civil do Grove, realizaban un punto de verificación na estrada PO-316 procederon a dar a alta a un taxi no que viaxaban os dous detidos, aos que se lles encontra unha pequena cantidade de hachix envolvida nun anaco de plástico transparente e, no rexistro do vehículo, atopan unha bolsa con 26 gramos de heroína.
Os dous detidos contan con antecedentes policiais e serán postos a disposición do Xulgado Instrución número dous de Cambados.